كـــلام جــــوايا

كلام جوايا




جوايا عمال يتكلم .. محتار و نفسه يفهم .. يا إما يفكر فيتألم .. يا إما يطفى دماغة و للواقع يسلم ..

شوية باحس إنى .. إنى مقضيها .. كل اللى عايزة باعمله و هى دى قمة المتعه ..

بس لما يبدأ افكر بأسأل نفسى سؤال .. طب و بعدين هفضل كل حياتى كده .. بابص تحت رجلى .. معنديش هدف اعيشله ؟؟

كل هدفى الوقت يعدى و خلاص .. و اكتشف فجأة ان مش بس الوقت عدى ..

ده حياتى كلها انتهت .

لااااا … بس انا عندى هدف .. زمان كان هدفى انجح و اخلص دراسة و … حققته

و بعدين هدفى احب و اتجوز .. و ده كمان هيتحقق ..

بعدين يبقى هدفى اجيب عيال و اربيهم و اشتغل عشان اصرف عليهم .. كل دى اهداف أنا باعيشلها ..

بس بصراحة دى اهداف رغم انها مهمة جدا لكن بتخلص و مش بتبسط بيها غير وقت قصير قوى و خلاص .

هو انا اتخلقت عشان كده و بس ؟؟

فجأة .. لقيت جوايا سؤال ..

سؤال بجد صدمنى .. ” طب و ربنا ” ؟؟؟ ده برة اهدافك ؟؟؟ ..

فقلت لأ طبعا ما انا باعمله اللى هو عايزة .. صيام .. صلاة .. و كده يعنى ..

فقاللى ” هو ربنا محتاج منك انت حاجة ؟؟ هو اصلا كامل فى كل حاجة ” .

ففكرت كده لقيت كلامه صح … بس كلامه حيرنى اكتر ..

هو ربنا ليه دعوة بهدف حياتى ؟؟؟ .. تفتكر ؟؟؟

فرد على رد بسيط .. رد حل كل التعقيد ..

هو مين اللى خلقك … و جابك الارض دي و البلد دى بالذات و فى الوقت ده ؟؟ …

يبقى … يبقى تفتكر من الوحيد اللى عنده الهدف من وجودك هنا ..

الهدف اللى لما تعرفه منه … هيغير حياتك و يديها معنى … هتلاقى حاجة تستاهل تعيشلها ..

بس صدقنى مش هينفع ..منه و بس .. لأن كل واحد فينا ليه خطة بتاعته هو .. هو و بس عند ربنا ..

سهل جدا تعرفها بس لما تعقد معاه و تطلب منه يوقلهالك ..

هو جابك هنا عشان هو بيحبك قوى و نفسه .. نفسه جدا تشاركه و يكون ليك علاقة قريبة قوى معاه .. و ساعتها هتفهم اكتر و اكتر ..

هتحب حياتك لان بقى ليها قيمة و معنى .. جرب و صدقنى هتكسب